الهضبه اسطورة غنائية

في استطلاعات الرأي الصحفية او التحقيقات اللي بتعملها الصحف او البرامج او حتي في اللقائات اللي بتكون مع الموسيقيين بنلاحظ ان الموسيقيين المعاصرين من شعراء وملحنين وموزعين بيشيدوا بالهضبة وبيوصفوه انه اسطورة غنائية وانه رقم واحد في الوقت الحالي وصنع لنفسه اسم هيستمر مدي الحياة..وانه سبب استمرار الأغنية المصرية ع القمة..ولما تسمع او تقرا رأي الموسيقيين القدامي تلاقيهم بيقولوا انه مجرد موضة اتجمع حواليها الشباب وانه بمجرد ما يعتزل هيختفي وماحدش هيفتكره وانه مؤدي او مغني محدود الامكانيات مايقدرش يغني الطرب وانه لولا ظهر في عصر الصورة ماكنش حقق اللي حققه ده ولو كان ظهر في زمن ام كلثوم وحليم كان انتهي وماقدرش يكمل.

ومن خلال الرأيين المختلفين تماما واللي عكس بعض كليا نقدر نلاحظ ان في بينهم فجوة كبيرة لكنها مش فجوة فنية او موسيقية قد ما هي فجوة زمنية وصراع بين الاجيال ..الفجوة الموجودة سببها الهضبة بتطوره الموسيقي وتمرده علي الواقع والجمود اللي أخد من الفن العربي اكتر ما اضفله!

موسيقيين السبعينات والستينات اللي عاشوا علي الغناء في الفترة دي وتوقفوا تماما عندها وعينوا نفسهم حماة لتاريخ الغناء والفن العربي وبقوا يرفضوا كل جديد وكان بيزعجهم كل تطور لانه هيكون ضدهم وضد ثقافتهم اللي توقفت عند مرحلة معينة وأصبح اي تطور بيبوظ ادمغتهم ويهنجها تماما وبيقفوا عاجزين قدامه .. فيهاجموه ويحاربوه باتهامه بانه اسفاف وافساد للذوق العام وان التطور ده هيكون مرحلة وهتنتهي وهيرجع الغناء للشكل القديم من تاني..الجيل اللي في نظره ام كلثوم و حليم مستحيل انهم يتكرروا وربما شايفين انه برحيلهم انتهي الغناء تماما ومات ومابقاش فيه اي فن حقيقي والموجود مجرد هبوط فني.

المشكلة اللي بيعاني منها الجيل ده في الموسيقي هي نفس المشكلة اللي بيعاني منها نفس الجيل من الصحفيين الرياضيين اللي في نظرهم كورة السبعينات والستينات كانت احسن فترة واحسن لعب وان محمود الخطيب مستحيل انه يتكرر..وان الموجود دلوقتي اغتراف مش احتراف زي ما بيردد بعضهم.

المشكلة المزمنة والآفة العربية اللي بنعاني منها وبنفضل نبص ورانا بدل ما نبص قدامنا ونطور من نفسنا ونواكب العصر..ونفضل نقول احنا اصحاب حضارة واحنا عندنا الفراعنة اللي عملوا وبنوا وسووا وبنفتخر بأمجاد الماضي السحيق واحنا واقفين محلك سر مش بنعمل ولو عملنا يظهر حماة الماضي ويهاجموا اللي عمل ويتهموه بالاسفاف والابتذال والمصطلحات الجاهزة مخصوص للحالات دي.

اذا كان الجيل القديم حقق ونجح فاحنا ولاد جيلنا بنحب مطربينا وبنسمعلهم وبالنسبالنا هما العظام ومن حقنا ننحاز لجيلنا ما دام من حقكم الانحياز لجيلكم ومن حقنا نشوف الهضبة اسطورة غنائية حقق اللي ما حققوش اي حد قبله وانفرد بانه اول مطرب عربي يوصل العالمية ويبقي ليه شعبية في كل شبر في الارض واغانيه تترجم بكل لغات العالم وبيحصل علي جوايز عالمية ماحصلش عليها اي جيل تاني..واذا كان حجتكم انه لو الهضبة ظهر في جيل الستينات والسبعينات ماكنش قدر ينافس وكان انتهي فأتقل مطرب في جيل الستينات والسبعينات لو ظهر في عصرنا في زمن التكنو والهاوس والريجاتون والترانس ماكنش حقق 1% من اللي حققوا..وماكنش قدر ينافس أفشل مطرب في زمن الألفية التالتة.

ياجماعة شوية موضوعية..كل الفنانين القدامي علي عينا وراسنا وليهم احترامهم انما احترموا فنانين جيلنا العظام اللي بنحبهم علي الاقل قوي لما ينجحوا ولو فشلوا قطعوا فيهم براحتكم